 |
| Pameungpeuk Garut 1918 |
Sejarah Pameungpeuk Garut
Di district Pameungpeuk aja hidji teloek nu kagoernita kaagrènganana baris jadi hidji palaboean noe piramèeun, nja èta Tjilaoeteureun. Ajeunana ogè mèh saban poè tara aja towongna para toean-toean ti anoe djaoeh merloekeun pelesir ka Tjilaoet-eureun laladjo pitempateun anoe bakal ramè tèa. Sadjaba ti bakal djadi palaboean ramè tèh kiwarina ogè Tjilaoeteureun tèh, hidji tempat anoe matak pikawaaseun, sigana imbang-imbangan baè sareng Kebon Radja di Bogor; koe lantaran èta Pameungpeuk tèh sakadar-kadar rada kamashoer; malah Frins Adolf ogè rakana Frins Hendrik, nalika pelesir ka Hindia geus merloekeun ningali ka èta tempat.
Baheula mah district Pameungpeuk tèh ngaranna lain Pameungpeuk tapi Nagara.
Koe naon pangdingaranan Nagara bet asa nënggang ti noe lian, kapan noe diseboet nagara mah ramè, ari ieu boro-boro ka ramè tèa kapan ajana ogè di pasisian Garoet, sisi Laoet Kidoel !.
Kieu ri saoer sëpoeh mah: diseboet sotèh Nagara nja èta pèdah pinagaraeun, djagana bakal djadi nagara noe ramè alah batan Batawi ajeuna; djaga mah dimana geus djadi nagara, geus datang ka oegana, Batawi tèh moal sadjèrè-djèrèeunana atjan; keur totondèna, oepama neundeun koelit moending sarirang di tengah djalan ka Tjilaoet-eureun, moal koengsi nepi ka sapoè kaboeroe mantèn djadi leboe, tina koe loba-lobana noe ngaliwat.
Sepoeh-sepoeh noe palertjaja kana oega gëtem naker ana njararioskeun hal èta tèh, malah doegi ka diètjès-ètjèskeun disebatan pitempateunana keur djaga tèh, sapértos: Katja-katjana, ti beulah koelon: Tji mangké (kirang langkoeng 7 pal ti aloen-aloen Pameungpeuk); ti wètan. Pagembrongan (kirang langkoeng 4 pal satengah ti aloen-aloen ajeuna), djadi pilegaeunana kota têh kinten-kinten 11 pal satengah.
Ngaran tempat-tempat ajeuna saoerna, lain sabongbrong kaseuseueuranana èta tèh prasasat keur tjawisan, kajaning: Pagembrongan (wètaneun Pameungpeuk, kabawah koe onderdistrict Tjibarègbèg, ajeunana ngeplak tegal saliara sapalih geus dikarebonan) di dinja tèh pikeun pasar, sababna noe matak disebat Pagembrongan ogé nja èta pèdah djelema ti mana-mana tèh di dinja bakal ngagalalembrongna, lantaran di dinja tèh baris pasar gedè.
Belengbeng (ajeunana rantja djeung tegal pangangonan) keur sawah, da sawah Pameungpeuk ajeuna mah (Tegal boeleud) ëngkèna bèak dipakè palaboean.
Sawah Tegal-boeleud (sisi kota Pameungpeuk) tah nja di dinja tjenah keur palaboean tèh, engkèna èta sawah tèh dikëdoek ti kidoel watesna pasir, keur wates minangka aling-aling djeung laoet, ari sisi palaboean ti kalèr nja kota Pameungpeuk ajeuna, djadi dina sawah ajeuna tèh djaga mah djadi tempat pasoeliwerna kapal noe hilir moedik, kawas di Tandjoeng Priok kiwari.
Paboearan (koeloneun Pameungpeuk, hidji kampoeng bawahan dèsa Mantjagahar), noe mimiti patamboear tèh nja oerang kampoeng èta, ari lantaranana pang patamboear, aboes kana paribasa djati kasilih koe djoenti, hartina priboemi kasedekeun koe sèmah kapaksa koedoe ingkah ninggalkeun lemboer matoeh diandih koe anoe anjar datang.
Tegah-lajang (kiwarina tegal ngentak pamoroan oentjal mentjek) noe matak dingaranan kitoe teh nja èta tjawisan pikeun tempat soerat-soerat, meureun moen disoerahan koe oerang ajeuna mah keur tempat kantor-kantor, tjara kantor, departemènt-departemènt, di dinja moengpoengna.
Pangawarèn (tegal saliara entakan djamangbaoe-baoe ampir satoengtoeng deuleu, djalan ka Tjilaoet-eureun), tah nja di dinja tjënah pitëmpateun gedong noe alagrèng tèh. Aja deui noe nerangkeun di Pangawarèn tèh bakal aja leuit salawè djadjar, sadjadjarna salawè-salawè, malah tjeuk sawarèh mah leuit-leuit djeung gedong-gedong tèh ajeuna ogè geus aja, keur tjawisan djaga, ngan di djero taneuh kènèh, engkè tèh dimana rèk djadi nagara bener, djol-djol jleg baè aja, noe matak di Pangawarèn mah ana ditintjak taneuhna sok ngagelendroeng. (Nanging djisim koering sëring mendakan salian di Pangawarèn ogè di tempat anoe sisi laoet mah seueur pisan tempat anoe ditintjak sok haroes ngagelendroeng, panginten baè koemangi di handapna keusik bèar (ngeproel) di loehoer taneuh, djadi tiasa haroes djalaran di handap seueur tempat hawa anoe teu padet kaeusian koe roepi barang (ngolowong); da di pagoenoengan mah noe taneuhna keket ti toehoer doegi ka handap, tara aja noe haroes sapértos kitoe).
Tjilaoet-euren, di dieu bakal djadi hidji palaboean noe mashoer ka mana-mana. Noe mawi disëbat Tjilaoet-eureun tèa ogé nja èta pikeun pang-eureunan, djadi sadajana kapal noe ngaliwat, di Tjilaoet-eureun mah dipastikeun eureun baè, kadjoegdjoeg saking koe ramè-ramèna, Pasar di loehoer laoet ogè nja di dinja bakal ajana, margana di loehoer laoet tèmah. Sanès Iantaran naon-naon, panginten awahing koe geus sësek baè di darat sèèpeun tempat.
Tina koe ramè-ramèna nagara, saking koe seueur-seueurna djalma, oepami parantos doegi ka oegana, di Nagara (Pamengpeuk) tèh bakal djadi sesah koe tedaeun, karèmbong tjindè hidji tèh moen ditoekeurkeun, oekoer kénging waloeh tjina saèsè, djadi moerah sandang soesah pangan.
Lampoena ogè tjënah djaga mah ti katja-katja koelon doegi ka katja-katja wètan tèh kedah diseungeut deui, saban Magrib braj hoeroeng sadajana, nja kitoe dina èndjing-èndjingna teu këdah ditioep deui, pes baè sadajana pareum (Panginten baè listrik. Oepami diemoetkeun, asa hèlok, naha èta anoe baheula bet tiasa nginten-nginten. Djisim koering tèh kinten heranna noe baheula ngadadarkeun perkawis oega oeninga kana listrik, sedeng èta sepoeh noe nërangkeunana ka djisim, koering ogè, lapoer saoemoerna boeleud hoeloe tjan ningal listrik, tërang ogè noe koemahaan listrik, teu atjan, kawantoe noe saoemoer-oernoer aja di Pakidoelan tara mantra-mantra njaba ka noe ramè).
Sadjabina ti ieu seueur deui tjarios-tjarios përkawis oega, nanging koe èmoetan henteu përloe didadarkeun di dieu, da sanès badè njarioskeun hal oega, ditjatoerkeun sotèh ieu mah moeng ètang-ètang katerangan kana témpat noe dingaranan Nagara tèa, soepados aroeninga jèn asalna teh kitoe. Doepi badè pertjanten henteuna mah, nja koemaha manah baè.
Naon margina Nagara dilandi Pameungpeuk ?.
Margina kieu: disebat Pameungpeuk tèh margi didjero èta pakemitan aja batoe di tengah lemboer ngarioeng agëngna kinten sami-sami sarëng tolombong. Eta batoe tèh wastana batoe Pameungpeuk; djadi disebat Pemeungpeuk tèh katelah koe èta batoe.
Eta batoe tèh ajana, naha ti barang ngadeg alam doenja, geus djoenggèrèng di dinja ?.
Henteu, èta batoe tèh tjek tjatoer pata sepoeh mah ajana rada bèh dieu, nja èta sanggeus goentoer laoet, sanggeus Tjipeleboeh mèngkol ngidoel, da baheula mah djaman Tjipeleboeh noendjang ngoelon ngamoeara ka Tjilaoet-eureun, èta batoe tèh euweuh, malah lëbah dinja tèh tengah-tengah waloengan. Noe matak ditelahkeun batoe Pameungpeuk ogè, nja èta bátoe noe meungpeuk Tjipèleboeh noendjang ngoelon.
Koemaha mimitina pang aja batoe èta tèh ?.
Atoeh koedoe njoektjroek heula poepoehoenanana oerang tjokot poerwa wiwitan ngadjadina, kieu tjenah asalna.
Di Pameungpeuk ajeuna tèh, baheula mah leuweung geledegan boro-boro ka aja lemboer tèa di dinja tèh padoemoekan maoeng djeung roepaning sato héwan tara mantra-mantra kasaba koe djelema. Ari lemboer noe gegek di Tjikopo (girangeun Pameungpeuk) – Djaman eta di dinja loba noe baleunghar, moending itoeng pasiran tèh lain omong bobohongan, djeung djëlëmana rata-rata njalantri; tjatjakan waktoe harita djaman ka Mekah makè kapal lajar kènèh, noe tjan tangtoe boelan taoenna koedoe ngangkleung di laoetan, lantaran kapalna koedoe noeroetkeun angin baè madjoena, tampolana loba noe toeloej tikelebek djadi parab laoek laoet. Tapi oerang Tjikopo mah loba noe geus djadi hadji, malah di lemboer èta aja kiai sagala.
Katjatoerkeun dina hidji mangsa ka tjikopo datang hidji loetoeng, djolna ti leuweung, aboes ka tëngah lemboer ger koe baroedak pada nalènggoran, tina berendjit ngagoeroeh, kolot~koIotna ogé ka loear milu moroan sang monjèt hideung. Ki Loetoeng bangor dibalèdogan tèh kalahka ngalèlèwaan sëmoe noe taja kagimir senang-sënang baè goegoentajangan talalèpa dina loehoer dahan kai. Gantjangna oerang lêmboer kabêh toengkeb pada miloe moroan, èar djalma noe soerak bari dibarengan koe pamalèngpèng djeung pamalèdog.
Tina kai kana kai deui èta loetoeng barang nepi ka lemboer Tjikopo, ti handap pada ngabring-ngabring gantjangna boes deui ka lemboer sèdjèn, nja èta lèmboer Tjidahon.
Dadak sakala èta loetoeng barang nëpi ka lemboer Tjidahon rada semoe lindeuk nëpi ka kekna beunang ditèwak, dikoeroengan koe ranggap paragi maraban hajam di pipir, dirogrog pada ngalaladjoan.
Di antara djalma noe sakitoe rèana, aja hidji kolot oerang dinja noe sakadar aja kanjahona, pok manèhna ngomong, pokna: “Ari loetoeng tèh tjeuk kolot mah sok aja toengtoengna. Tjik bisi lain loetoeng samanèa, geuning bet asa bageur-bageur teuing dikoeroengan tèh teu daèkeun adoeg gabroet jeung teu pati èraeun koe djelema ogé deui, bet kawas lain sabongbrong, hajang njaho oerang dodja, kabiasaanana loetoeng leuweung mah taja lain noe didaharna ngan bangsa poepoetjoekan, salian ti èta tara daèkeun. Ajeuna koe oerang oerang soegoeh roeroedjakan djeung kadaharan; lamoen baè loetoeng biasa, geus tangtoe moal daèkeun, tapi lamoen lain saloetoeng-loetoengna, tangtoe panjoegoehan oerang didahar”.
Kotjap èta kolot boel ngoekoes ngadowaän keur soesoegoeh, song diasongkeun, diaboeskeun kana djëro ranggap.
Sang loetoeng kawas geus mangarti, barang song ogè teu antaparah deui, roedjak djol legoek diinoem, kadaharan djob kedewek baê didahar. Atoeh kabeh pada hèlok; disëboetkeun loetoeng koekoet, da euweuh noe manggihan, aja djalma ngoekoet loetoeng, diseboetkeun loetoeng leuweung, meureun moal daèkeun dahar panjoegoehan; tètèla tjèk sangkaanana moe1 salah ieuh, tangtoe lain loetoeng samanèa.
Sabot kabèh ngaharoeleng bingoeng koe mikiran eta, naha naon gara-garana, aja doea boedak nëmpo kana ranggap, koe eta loetoeng ditjidoehan.
Beurang kasapih koe peuting, djalma-djalma baralik ka saimah-imahna, eta letoeng anggër baê dikoeroengan satadi. Kokolot tea ladjoe diangir rnandi, reup peuting menekoeng moedjasmèdi. Barang reup sarè di djol bae dina itoenganana, ngirnpi ka soempingan tamoe agoeng noe anjar pinanggih. Saoer eta tatamoe: Bisi maneh teu njaho aing teh nja noe ngaroepakeun loetoeng tea. Pang datang ka deui aing rek mindahkeun waloengan Tjipaleboeh oe1ah sina ngamoehara ka Tjilaoet-eureun; maksoed aing isoek arek ka Tjilaoet-eureun, koe maneh koedoe dianteurkeun.
Aing heran katjida, datang ka lemboer Tjikopo bet rek pada nganiaja; sakitoe deui keun baè, meureun euweuh noe njahoeun mana baroga karep rek mergasa oge; tapi hate rada mentëgeg bae, di dinja koe saroepa euweuh noe djadi kokolotna; geura deuleukeun ëngkè!
Bisi maneh rada tjangtjaja ka aing, aing mere totondè tadi geus njidoehan doea boedak, awaskeun eta doea boedak djagána bakal ingkah moal aja di bali geusan ngadjadina.
Sakalian aing mere inget sakeudeung deui baris aja gara-gara noe pohara, koe hal eta maneh djeung sararea koedoe ati-ati, Sakitoe baè”.
Barang ras inget eta kolot gantjang pakoepis hadjat njalametkeun saaja-aja, djeurig eta loetoeng dipoendjoeng-poendjoeng.
Isoekna eta loetoeng dikaboearkeun tina ranggap, adjaib kawas noe geus ngarti, djol ingkig baê indit madjoe, leumpang noedjoe ka lebah Tjilaoet-eureun diringkeun koe kokolot djeung sawatara batoerna; barang nëpi ka tengah leuweung tjat eta boetoeng naek kana loehoer kai bes bae teu tèmbong deui, noe ngalanteurkeun gantjangna moelang, sadatangna ger hadjat.
Doea boedak noe ditjidoehan loetoeng tea teu mangkoek sabaraha lilana djang di Kawadanan ti dinja pindah-pindah, nepi ka kiwari teu aja bédja-bédjana atjan.
Sawangsitna loetoeng teu njalahan deui jén baris aja gara-gara pohara, ana ger téh goentoer laoet noe pohara pisan, lambak djedjelegoeran sagedé-gedé naon, pasir aling-aling sisi Laoet noe sakitoe loehoerna geus teu témbong poentjak-poentjakna atjan, pirang-pirang lernboer kakeueum, Tjikopo noe sakitoe loehoerna djeung djaoehna kira doea pal ti Laoet ngembeng kakeueum, lambak téh dar-der meupeus di sisi pasir tonggoheun lemboer. Tapi aneh, ari lemboer Tjidahon mah noe sakitoe handapina koe Iaoet teu kakeueum, tjék bédja mah lantaran di dinja aja pakoeboeran Wali. Harita oerang Tjidahon bisa noeloengan hidji Kiai oerang Tjikopo noe keur djadi sarah antjleung-antjleungan di tengah sagara; disodoran tambang nepi ka salametna tina bahja maot, teu toenéangan babatang rek dikoeboer.
Lemboer Tjikopo noe sakitoe gegekna téh rangkad kabawa dibebaskeun koe tjai.
Saanggeusna saat balik sabiasa asalna deui bangké patoelajah di oenggal tempat geus teu poegoeh bilanganana Noe salamet leupas tina bahaja ngabring njaksrak néangan babetang rek dikoeboer.
Di sisi hidji rantja sisi laoet aja tangkal gebang loehoer, di loehoerna aja boedjal ngait kanoe palapahna, doeka boedjal oerang mana, nepi ka kwari éta rantja katelah rantja boedjal, hilireun éta kira-kira sepal, béh deui manggah pendjit djelerna, nja kitoe njangsang dina gebang saperti noe tadi, nja nelah anjeunana Tjitjadoek.
Katjatoer waloengan Tjipeleboeh noe noendjang ka koelon, djadi méngkol noendjang ngidoel, dina lebah paméngkolan aja batoe ngagoendoek nja noe diseboet batoe Pameungpeuk téa, hartina meungpeuk Tjipeleboeh soepaja oelah ngamoeara ka Tjilaoet-eureun. Tah ti harita ajana batoe Pameungpeuk téh.
Tjeuk patjatoeran karoehoen saha-saha noe geus mindeng nginoem Tjipeleboeh sok keleboeh, hartina toeloej boemetah di dinja. Kaboektian ajeuna noe njitjingan Pameungpeuk téh réréana djalma ngoembara. A. Ganda Prawira ... Sumber: naratasgaroet.wordpress.com
Dijual Majalah Cetakan Lama
Dijual Buku Pelajaran Lawas
Saya JAY SETIAWAN
tinggal di kota Bandung. Selain iseng menulis di blog, juga menjual buku-buku bekas cetakan lama. Jika sahabat tertarik untuk memiliki buku-buku yang saya tawarkan, silahkan hubungi Call SMS WA : 0821 3029 2632. Trima kasih atas kunjungan dan attensinya.
tinggal di kota Bandung. Selain iseng menulis di blog, juga menjual buku-buku bekas cetakan lama. Jika sahabat tertarik untuk memiliki buku-buku yang saya tawarkan, silahkan hubungi Call SMS WA : 0821 3029 2632. Trima kasih atas kunjungan dan attensinya.
Posting Komentar