Dongeng Sunda Budak Tukang Ngadu Hayam

Si Dudung Tukang Ngadu Hayam

Aya hiji budak lalaki ngarana Dudung. Si Dudung kacida baong jeung kacida ngedulna. Pagawéan sapopoéna nya éta ngadu hayam.

Hayam aduanana kacida dipameumeutna. Buluna salawasna hérang, jeung siihna seukeut waé. Ku manéhna dingaranan Si Jago.

Dina hiji poé manéhna indit ka kampung sabrang rék ngadu, bari ngéngélék hayam Si Jago.

Sanggeus nepi ka nu dituju, der hayamna diadukeun jeung Si Jagur hayam Si Imot.

Hayam si Dudung geus sadia narima serangan musuh, panonna neuteup seukeut ka Si Jagur.

Braakkk Si Jagur nyuruduk ka Si Jago. Atuh Si Jago ngajoprak. Si Jagur beuki galak, jeprot-jeprot ngabintihan. Si Jago teu walakaya. Tapi ku Si Dudung dipaksa nangtung, bari diguyur ku cai ambéh seger deui cenah.

Tapi acan ogé nangtung, Si Jagur geus nyuruduk deui. Atuh Si Jago beuki teu walakaya, nepi ka paéhna.

Lantaran geus éléh, Si Dudung balik ka imahna. Di imahna geus nyampak budak lalaki pantaran manéhna, anu dibaturan ku buta.

Si Dudung diadukeun jeung budak lalaki téa ku Si Buta, bari dipapanas.

Ger baé Si Dudung gelut. Duanana geus pada-pada capéeun, jeung baloboran getih. Tapi ku Si buta terus baé diadukeun teu meunang eureun.

Lantaran geus teu kuat nahan nahan kanyeri, blug waé Si Dudung labuh, tuluy jejeritan bakat ku nyeri, bray beunta korejat hudang.

Ti harita manéhna tobat. Ayeuna Si Dudung tara ngadu hayam deui.
Kénging: Nuryatiningsih Sudrajat Dicutat tina: Majalah Mangle No.907 taun 1983

Dijual Buku Antik dan Langka Sastra Sejarah Dll
Dijual Majalah Cetakan Lama
Dijual Buku Pelajaran Lawas

Saya JAY SETIAWAN
tinggal di kota Bandung. Selain iseng menulis di blog, juga menjual buku-buku bekas cetakan lama. Jika sahabat tertarik untuk memiliki buku-buku yang saya tawarkan, silahkan hubungi Call SMS WA : 0821 3029 2632. Trima kasih atas kunjungan dan attensinya.